Si sot, plot 60 vjet përpara një njeri i jashtëzakonshëm i quajtur Juri Gagarin, do të bëhej njeriu i parë në historinë e botës që do të udhëtonte në bordin e një anije kozmike në hapësirën rreth tokës.
Kjo gjë u bë e mundur nga qeveria komuniste e ish-Bashkimit Sovjetik, ose Rusia e sotme, e cila në fund të viteve 1950 kishte nisur së bashku me Shtetet e Bashkuara të Amerikës një garë të ethshme si për armatime strategjike konvencionale, ashtu dhe për të pushtuar hapësirën qiellore.
Por në kohë që SHBA-të po bënin prova të shuma me raketa të mëdha ndërkontinentale dhe anijet e tyre kozmike, sovjetikët arritën që të triumfonin të parët në këtë garë me Gagarinin.
Ky i fundit e kishte nisur karrierën e tij në Forcat Ajrore sovjetike si pilot i avionëve të parë reaktivë dhe më pas doli vullnetar në testimet që qeveria sovjetike nisi të kryej me pilotët për të gjetur të përshtatshmit për në hapësirë.
Fluturimi që do të ndryshonte historinë e botës
Në mëngjesin e 12 prillit 1961, platforma raketë-mbajtëse e lëvizshme 287-tonëshe mbante mbi vete anijen kozmike “Vostok” të cilën e zhvendosi gradualisht në pusin e stërmadh të sheshit të lëshimit.
Në agim pranë strukturës së stërmadhe ndaloi një autobus i vogël, ku qe ulur kozmonauti Gagarin, i veshur me skafandër dhe kostum hermetik hapësinor me germat e mëdha: “BRSS”.
Ai përshëndeti me duart ngritur dhe bëri drejt raketës. Në orën 09:07 sipas orës zyrtare të Moskës, togeri Juri Gagarini tha fjalën, që hyri në histori: “Nisemi!” Dhe po atë sekondë anija “Vostok” startoi nga kozmodromi i Bajkonur-it në Kazakistan (ish-republikë Sovjetike).
Pas fluturimit, Gagarini u bë fytyra e atdheut të tij, rol, të cilin e luajti gjithashtu në mënyrë të përsosur. Nuk e harroi edhe detyrën në grupin e kozmonautëve. Por për lavdi atij i ishin paracaktuar vetëm shtatë vite. Më 28 mars 1968 kozmonauti i parë në botë, u vra në mënyrë tragjike gjatë një fluturimi stërvitor më një avion “MIG-21”.
Historiku i Juri Gararinit
Piloti kozmonaut i parë në botë, lindi në një familje fshatare në fshatin Klushino, qarku i Smolenskut. Në klasën e parë të shkollës së fshatit, Juri në vjeshtën e vitit 1941-it mundi të mësojë vetëm disa ditë.
Fëmijëria mori fund, kur fshatin e pushtuan nazistët. Dy vite pas pushtimit të fshatit, Gagarini e vazhdoi shkollën dhe mbaroi gjashtё klasa. Pastaj studioi njëkohësisht në teknikum në Luberci, pranë Moskës dhe në shkollën e rinisë punëtore.
Në vitin 1951, Gagarini vazhdoi mësimet në teknikumin industrial të Saratovit. Më 1954 nisi të angazhohej në aeroklubin e Saratovit, më vonë shkolla e aviacionit dhe shërbimit të flotës së Veriut.
Togeri Gagarin kaloi përzgjedhjen në grupin e kozmonautëve dhe, pas provave të panumërta u përzgjodh për misionin më të përgjegjshëm dhe më të rrezikshëm që i ishte ngarkuar direkt nga Byroja Politike e BRSS-së.
Ky mision ishte delikat për dy arsye: e para, sepse ishte një mision politik (gara për hapësirën me SHBA-të); e dyta, sepse ishte një mision shumë i rrezikshëm pasi teknologjia nuk ishte ajo që është sot, por dhe informacionet për kozmosin dhe ndikimin e tij te njeriu, ende nuk njiheshin në atë kohë.
Pas këtij misioni të jashtëzakonshëm piloti kozmonaut i BRSS-së, Gagarini, u nderua me titullin më të lartë të vendit “Hero i Bashkimit Sovjetik” dhe më pas edhe me të tjerë tituj, si “qytetar nderi” i shumë qyteteve ruse dhe të huaja.
/Priza.al/
Ky artikull është ekskluziv i “Priza.al”, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar “Priza.al” dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
