Pas lajmit të publikuar në media se uji i Syrit të Kaltër, do të furnizonte ishullin grek të Korfuzit, ka reaguar Ministria e Turizmit dhe Mjedisit, e cila deklaron se nuk ka asnjë marrëveshje të tillë dhe pretendimet e mediave janë të pavërteta.
Gjithashtu Ministria thekson se Syri i Kaltër është një pasuri natyrore e vendit dhe se në janar të këtij viti është shpallur si “Park Natyror”, për ta mbrojtur këtë të fundit.
Njoftimi i Ministrisë së Turizmit dhe Mjedisit:
Ministria e Turizmit dhe Mjedisit, nisur nga disa lajme të përhapura në media të ndryshme mbi një propozim/memorandum teknik të supozuar të furnizimit me ujë me transferim burimi nga Syri i Kaltër drejt Korfuzit, sqaron:
Nuk ka asnjë marrëveshje të tillë dhe as nuk ka pasur diskutime për një projekt të ngjashëm sipas lajmit të përhapur nga mediat. Pretendimet e ngritura janë të pavërteta.
Syri i Kaltër është një pasuri natyrore e Shqipërisë, i cili me vendimet e muajit janar 2022 ka marrë një status më të lartë mbrojtjeje, atë të “Parkut Natyror” me një sipërfaqe të rritur në 293 hektarë, për të mbrojtur më mirë Monumentin e Natyrës me të njëjtin emër, që mban brenda parkut.
