Një çelës që besohet se ishte i tualetit personal të kancelarit nazist Adolf Hitler, është shitur në Britani për thuajse 14,000 paundë.
Sendi i rrallë u bë objekt i një “lufte” të vërtetë ofertash në ankandin mes blerësit britanik që kaloi i pari shumën e pritur dhe disa rivalë të tjerë nga Gjermania e Britania.
Çelësi i Hitlerit me shumë gjasa ishte marrë si “suvenir” nga zyra e krye-nazistit, prej ushtarëve të forcave aleate, para se të shitej në ankand 76 vjet më vonë.
Bashkë me dy çelësat, janë të varura në unazën metalike edhe emblema me shqiponjën gjermane dhe zvastikën (kryqin e thyer) naziste, me mbishkrimet “Reicjskanzleri” (Kancelaria e Rajhut) dhe “Herren W” (tualeti i burrave) me një numër “166” në të.
Objekti besohet se është gjetur në tavolinën e Hitlerit nga një pilot britanik, pas çlirimit të Berlinit në fund të Luftës së Dytë Botërore.
Ai është sjellë si kujtim nga piloti lejtnant A.A Williams, i cili e kishte mbajtur deri në vdekjen e tij, madje kishte shkruar një letër për autenticitetin dhe prejardhjen e objektit.
Në letër Williams shpjegonte: “Çelësi i tualetit ‘Reicjskanzlei’ është marrë nga unë prej tavolinës së vetë Adolf Hitler. A.a. Williams, leitnant fluturimi, Forcat Britanike Ajrore, korrik 1945”.
Objekti më pas i kaloi të ndjerit Reg Palmer, i cili e mbante në muzeun e tij të vogël në Londër në vitet 1980- ’90-të.
Një koleksionist e kishte blerë atë 10 vjet më parë dhe tani e shiti me ankandet “Ashford C&T Auctions”, të cilët parashikonin se do të shitej për vetëm 300 paundë.
Por një luftë e pa ndalur ofertash nga tre blerës britanikë online dhe të tjerë nga Gjermania, ngritën çmimin përtej parashikimeve.
Specialisti i ankandeve Matthew Tredwen tha: “Megjithëse i vogël, është një pjesë unike historie. U shit shumë shtrenjtë, si blerësi dhe ne jemi të kënaqur me rezultatet. Çelësi është gdhendur në fjalën ‘Herren’ që do të thotë ‘Burra’, prandaj është një zonë vetëm për meshkuj”.
“Hitleri kishte tualetin e tij privat dhe çelësi besohet se ishte për këtë qëllim”.
Hitler besohet se vdiq me vetëvrasje, pasi shanset që Gjermania naziste të fitonte luftën u shuan.
/Priza.al/
