Një nga pallatet e dëmtuara nga tërmeti i 26 nëntorit në Durrës është shembur nga punonjësit e IKMT-së.
Janë rikthyer shembjet me shpërthim të kontrolluar të godinave të dëmtuara nga tërmeti në Durrës.
Rreth orës 14.00 të së hënës forcat xheniere të ushtrisë, IKMT dhe Inspektorati i Mbrojtjes së Territorit Durrës kanë kryer shembjen me shpërthim të kontrolluar të pallatit 8-katësh në lagjen 18 të qytetit.
Shpërthimi i fortë ka sjellë edhe dëmtim të një prej bizneseve që ndodheshin afër.
Shpërthimi është dëgjuar në të gjithë qytetin bregdetar, ndërsa deklarohet se në trupin e godinës qenë hapur 700 furnela për vendosjen e lëndës eksplozive.
Për arsye sigurie, banorët e banesave dhe bizneset përreth pallatit u larguan nga zona. Paraprakisht dëmet në godinat përreth deklarohen të pakta dhe kryesisht në xhamat e dyerve dhe dritareve.
Kujtojmë se tërmeti vdekjeprurës i 26 nëntorit shkaktoi 51 viktima, ndërsa mbi 3,000 vetë u plagosën dhe mijëra të tjerë mbetën pa shtëpi.
/Priza.al/
