Një sasi tritoli shpërtheu mbrëmjen e djeshme në banesën në pronësi të Mehmet Baftjarit në Fushë-Krujë.
Mësohet se ky i fundit ka dëshmuar në polici se nuk ka konflikte me asnjë njeri. Baftjari është me origjinë nga Kukësi.
Eksplozivi shpërtheu në pjesën e pasme të banesës dhe fatmirësisht pati vetëm dëme materiale.
Njoftimi i policisë:
Rreth orës 22:40, në lagjen “Magaze”, Fushë Krujë, në oborrin e banesës së shtetasit M. B., 54 vjeç, ka shpërthyer një sasi e vogël e dyshuar lëndë plasëse, duke shkaktuar dëme të vogla materiale.
Grupi hetimor ndodhet në vendngjarje dhe po punon për sqarimin e rrethanave të ngjarjes, me qëllim identifikimin dhe kapjen e autorit/ëve.
