Presidenti rus Vladimir Putin e kaloi këtë fundjavë në “mbretërinë e Taiga-s”, duke drejtuar një automjet të veçantë bore “GAZ 3351” me zinxhirë, ideal për terrenet e vështira ruse.
I konsideruar si “bisha e dëborës”, autotransportieri është një prodhim i ri rus i “GAZ-it” të famshëm, ose një analog i suedezit “BV-206”, i cili është ndërtuar me patentë dhe licencë nga Federata Ruse.
Gjatë fundjavës së kaluar në Siberi, presidenti Putin ishte bashkë me ministrin e tij të Mbrojtjes, Sergei Shoigu.
Në videon që tashmë ka vërë xhiron e mediave botërore, Presidenti rus, Vladimir Putin, ka shpalosur një prej pasioneve të tij, atë të ngarjes së automjeteve jashtë-rruge, ku kësaj here drejtoi një automjet që përshkon të gjitha llojet e terreneve, mes pyjeve të dendur dhe kaloi madje edhe një urë të varur.
Jo rrallë presidenti Putin shfaqet në televizionin shtetëror rus, ndërsa merr pjesë në aventura të ndryshme në natyrë dhe duket qartë se ai synon të ndërtojë imazhin e një lideri të shëndetshëm dhe të fuqishëm.
Eksplorimet e tij me gjoks të zhveshur, kanë ngulitur tek shumëkush imazhin e 68-vjeçarit Putin, si një model i formës së shkëlqyer fizike. Videot e fundit të shpërndara nga Kremlini, me presidentin me një lloj traktori të fuqishëm, e tregonin atë teksa çante përmes borës dhe një pylli të dendur.
Putin dhe Shoigu, shihen teksa ecin mes borës që mbërrin deri në gju dhe kalojnë një urë të varur në litarë mbi një lum të ngrirë. Më herët gjatë viteve, kemi parë Putinin ndërsa peshkon, drejton një skaf të fuqishëm, apo që merr rreze dielli.
/Burimi: Daily Mail/Përshtati: Priza.al/
