Nuk është menduar dy herë por ja ka mbathur “nga sytë këmbët”, sapo i është dhënë mundësia e parë, për të shpëtuar kokën…
Kjo ka ndodhur sot me Presidentin e Afganistanit, Ashraf Ghani, i cili zgjodhi jetën përpara atdheut.
Ai nuk ka qëndruar t’u bëjë ballë hordhive të talebanëve që morën si në një “lojë lufte” gjithë vendin, po ka preferuar të largohet për në Taxhikistan për të shpëtuar kokën.
Ky veprim i shpejtë vjen pasi talebanët kanë hyrë në kryeqytetin Kabul dhe po marrin edhe institucionet.
Ministri i Brendshëm njoftoi lajmin e largimit të Presidentit, teksa zyra e Ghani-t thotë se largimi është bërë për arsye sigurie.
Në fakt talebanët me hyrjen në qytet ishin duke e kërkuar Presidentin Ghani teksa më parë i kishin bërë thirrje të dorëhiqej.
Largimin e Presidentit afgan Ashraf Ghani, e konfirmoi edhe një zyrtar i lartë i ministrisë së Brendshme për “Reuters”.
I pyetur për koment, zyra e presidentit “nuk mund të thotë asgjë për lëvizjen e Ashraf Ghani për arsye sigurie”.
Ndërkohë, një zyrtar taleban tha se, ata po kontrollonin raportet në lidhje me largimin e Ghanit nga vendi.
/Priza.al/
