Kjo fundjavë shënon 10 vjetorin që kur Osama Bin Laden, kreu i sulmeve të 11 Shtatorit 2001 ndaj Shteteve të Bashkuara, u vra nga forcat speciale amerikane, Seal Team 6, brenda kompleksit të tij në qytetin Abbottabad, në Pakistan.
Emri i tij dhe i rrjetit të tij terrorist, përcaktoi një epokë të reagimit dhe ndëshkimit nga ana e SHBA . “Lufta kundër terrorit” në Amerikë është gati të hyjë në një fazë të re ndërsa presidenti Joe Biden po përgatitet të tërheqë të gjitha forcat e SHBA nga Afganistani deri në 20 vjetorin e 11 shtatorit, por tani al Qaeda pretendon se luftës me Amerikën nuk i ka ardhur ende fundi.
Në një intervistë ekskluzive për CNN, dy pjestarë të al Qaeda-s thonë se “lufta kundër SHBA do të vazhdojë në të gjitha frontet e tjera nëse ata nuk largohen nga pjesa tjetër e botës islamike”.
Në të kaluarën al Qaeda rrallë u është përgjigjur pyetjeve, duke zgjedhur të fshihet pas propagandës së vet. Është e paqartë arsyeja se pse grupi ka zgjedhur ta bëjë këtë deklaratë tani.
Analisti i terrorizmit Paul Cruickshank, thotë se është e mundur që “ata ndihen të mërzitur nga vendimi i administratës së Biden për të tërhequr trupat nga Afganistani, por ata gjithashtu mund të kërkojnë të zhvendosin vëmendjen nga shumë humbje që kanë pasur kohët të fundit “.
