Një konflikt për motive pronësie ka përfunduar në tentativë vrasje në Elbasan. Për pasojë u arrestua 34-vjeçari i identifikuar si Gentian Myrta, banues në fshatin Shushicë, i cili goditi me automjet dhe me levë metalike, fqinjin e tij. Ai u kap në pikën kufitare të Kapshticës, në tentativë për t’u larguar nga vendi ynë.
Konflikti mes tyre ka ndodhur ditën e djeshme, kur Myrta ka goditur me automjet dhe me levë metalike, fqinjin e tij, Hamit Mehmetaj, 57 vjeç, banues në fshatin Shushicë, Elbasan, i cili lëvizte me biçikletë. 57-vjeçari ndodhet në spital, në kujdesin e mjekëve.
Në cilësinë e provës materiale u sekuestruan mjeti i fortë (levë metalike) dhe automjeti që dyshohet se janë përdorur nga 34-vjeçari.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprën penale “Vrasja”, mbetur në tentativë.
