Një efektiv policie në Berat është pezulluar nga detyra pasi është filmuar duke marrë ryshfet nga një qytetar.
Policia në bën me dije se vendimi është marrë nga Drejtori i Drejtorisë Vendore të Policisë Berat.
Tashmë Agjencia e Mbikëqyrjes Policore ka nisur hetimin penal në lidhje me këtë çështje ndërkohë që policia i bën thirrje qytetarëve të denoncojnë çdo shkelje të ligjit
Njoftimi i policisë:
Në lidhje me rastin e transmetuar mbrëmjen e sotme, në emisionin investigativ “Stop”, ku në pamje filmike shfaqet specialisti për Hetimin e Krimeve të Komisariatit të Policisë Berat, Nënkomisar L. F., duke i marrë një shumë parash një shtetasi, ju sqarojmë se:
Menjëherë pas publikimit të pamjeve, Drejtori i Drejtorisë Vendore të Policisë Berat ka bërë pezullimin e menjëhershëm nga detyra, të specialistit për Hetimin e Krimeve të Komisariatit të Policisë Berat, shtetasit L. F.
Njëkohësisht, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur ecurinë disiplinore ndaj punonjësit të Policisë, për shkelje të rëndë, ndërsa AMP-ja ka nisur hetimi penal për këtë rast.
Drejtoria Vendore e Policisë Berat falënderon mediat dhe qytetarët që denoncojnë raste të abuzimit me detyrën të punonjësve të Policisë, dhe iu garanton reagim të menjëhershëm, të paanshëm dhe konform ligjit.
