“Burg pa afat” për të atin e Arbër Çekajt. Është kjo masa e sigurisë e caktuar sot nga ana e Gjykatës së Durrësit për Selim Çekaj, pasi u kap me 49 kg lëndë narkotike.
Gjatë seancës gjyqësore ai nuk i ka pranuar akuzat, duke deklaruar përpara trupit gjykues kryesuar nga gjyqtari i çështjes Rexhep Bekteshi, se nuk kishte dijeni për sasinë e drogës së gjetur.
Selim Çekaj u vu në pranga pas kapjes së 49 kg kokainë në kontejnerin me banane që vinte nga Ekuadori. Kontejneri ishte porosi e Çekajt, dhe do të mbërrinte në magazinën e tij “Ecoalmax” në Maminas.
Çekaj ka hapur kompaninë me emrin “Ecoalmax” një muaj pas kapjes së sasisë së kokainës në magazinat e të birit, për transportin e bananeve nga Ekuadori.
Në kontejnerët që transportonin bananet që vinin për llogari të kompanisë së tij, policia gjeti 49 kg kokainë duke e vënë në pranga atë.
Selim Çekaj është babai i Arbër Çekajt, i cili gjithashtu është në qeli për kapjen e 613 kg kokainë në kontejnerin me banane që vinte nga Kolumbia në vitin 2018.
