Federata Shqiptare e Futbollit ka dënuar ashpërsisht dhunën e ndodhur sot gjatë ndeshjes Football Republic-Teuta, e vlefshme për Grupin B të Kategorisë Superiore U-19.
Në deklaratën zyrtare, FSHF i ka kërkuar policisë të arrestojë autorët, e madje e ka kritikuar atë duke thënë se në shumë raste nuk ka vepruar në kohë dhe i ka lënë autorët e dhunës të lirë. Sipas saj, nuk do të lejohet që në asnjë çast të nëpërkëmbet futbolli na sjelljet e turpshme të disa prindërve të lojtarëve dhe autoriteteve që nuk veprojnë.
NJOFTIMI NGA FSHF
Federata Shqiptare e Futbollit dënon ashpërsisht dhunën e ndodhur sot në ndeshjen Football Republic-Teuta, e vlefshme për Grupin B të Kategorisë Superiore U-19.
FSHF i bën thirrje Policisë së Shtetit të marrë urgjentisht masat për të arrestuar autorët e ngjarjes së rëndë dhe kërkon nxjerrjen e tyre para gjykatës, bazuar në Kodin e ri Penal.
Dëshirojmë të theksojmë se në shume raste Policia e Shtetit nuk ka vepruar në kohë dhe autorët e ngjarjeve të mëparshme ndodhen ende të lirë.
Një thirrje shkon dhe për sistemin gjyqësor në Shqipëri, që duhet të zbatojë me rigorozitet Kodin Penal, i cili ruan shenjtërinë e fushës së blertë.
FSHF nuk do të lejojë në asnjë çast nëpërkëmbjen e lojës më të dashur të shqiptarëve nga sjelljet e turpshme të disa prindërve dhe autoriteve që nuk reagojnë në kohë.
