Ushtria nxori tanket dhe mjetet e blinduara nëpër rrugët e Bejrutit sot gjatë ditës, teksa pas ndërprerjes kombëtare të energjisë elektrike, kryeqyteti libanez është përfshirë nga kaosi dhe përplasja e armatosur mes protestuesve të dhunshëm dhe forcave të rendit.
Protestues të armatosur të mbështetur nga grupe militante si Hezbollah e Amal demonstronin kundër Tarek Bitar, gjyqtarit kryesor të çështjes së shpërthimit katastrofik në portin e qytetit një vit më parë.
Beiruti ngjasonte sot me një zonë lufte, teksa autoblindat zbritën në zonat e ndara të qytetit. Ushtria tha se, do të qëllonte ndaj çdo personi të armatosur ndërsa raportimet vendase flasin për të paktën 5 të vrarë.
Ushtria kishte dislokuar tanke e autoblinda, teksa të shtënat ishin përqendruar në një ndërtesë ku besohej se ishin strehuar militantët.
Kryeministri Najib Mikati, bëri thirrje për qetësi ndërsa ushtria tha se, zjarri i armëve kishte nisur kur demonstruesit kaluan në zonën ndarëse, mes të krishterëve dhe myslimanëve të qytetit.
Ministria e brendshme e vendit tha se, pesë njerëz janë vrarë nga zjarri, mes të cilëve dhe të qëlluar me snajperë. Disa të tjerë janë plagosur.
Më herët kreu i grupit “Hezbollah” Sayyed Hassan Nasrallah, bëri thirrje për zëvendësimin e gjykatësit të shpërthimit në portin e Bejrutit, duke e akuzuar si të njëanshëm.
Në shpërthimin e 4 gushtit 2020 në portin e kryeqytetit u vranë të paktën 200 njerëz dhe u plagosën rreth 7500, prej shpërthimit të rezervave të kimikateve të depozituara në port.
/Burimi: Daily Mail/Përshtati: Priza.al/
