Jo vetëm nga bazat, nëndetëset, apo kamionët, por tashmë Koreja e Veriut ka nisur lëshimin e sistemeve të reja raketore edhe nga një tren. Këtë sistem raketor vendi do ta përdorë për të testuar raketa që janë lëshua në shënjestra testimi pranë Japonisë.
Raketat u lëshuan nga një “sistem i transportuar nga hekurudha”, i krijuar si një kundër-sulm i mundshëm ndaj çdo force që kërcënon vendin, njoftoi të enjten agjencia shtetërore e lajmeve “KCNA”.
Raketat fluturuan 497 milje përpara se të godisnin një objektiv në detin e Japonisë në brigjet lindore të Koresë së Veriut, tha KCNA. Autoritetet e Koresë së Jugut dhe Japonisë, u alarmuan pas realizimit të testit, i cili u bë disa ditë pasi Koreja e Veriut testoi një raketë lundrimi me aftësi bërthamore këtë fundjavë.
Ndërkohë, në të njëjtën ditë kur Koreja e Veriut testoi sistemin e saj të integruar në tren, Koreja e Jugut, testoi në natyrë një raketë balistike të lëshuar nga nëndetëset (SLBM), duke u bërë kështu vendi i parë pa armë bërthamore që zhvillon një sistem të tillë.
Dy Koretë kanë qenë në një garë gjithnjë e më të nxehtë të armëve, me të dyja palët që zbuluan raketa më të afta dhe armë të tjera.
Testimet nga Koreja e Veriut ngritën një shqetësim ndërkombëtar, me Shtetet e Bashkuara që thanë se, shkelën rezolutat e Këshillit të Sigurimit të Kombeve të Bashkuara dhe përbënin një kërcënim për fqinjët e Phenianit.
“Sistemi raketor i transportuar nga hekurudha shërben si një mjet kundërsulmi efikas, i aftë për t’i dhënë një goditje të ashpër dhe të menjëhershme forcave kërcënuese”,- tha Pak Jong Chon, një marshall i Koresë së Veriut i cili mbikëqyri testimin.
Fotografitë e publikuara nga mediat shtetërore treguan një raketë jeshile që ngrihej mbi një kolonë tymi dhe flakësh nga çatia e një treni të parkuar në binarët në një zonë malore. Koreja e Jugut kishte raportuar se raketat ishin lëshuar nga zona qendrore e brendshme e Yangdok.
“Raketat hekurudhore janë një opsion relativisht i lirë dhe i besueshëm për vendet që kërkojnë të përmirësojnë nivelin e forcave të tyre bërthamore. Rusia e bëri këtë gjë kurse SHBA-të e konsideroi si një mundësi. Nuk është pa sens edhe për Korenë e Veriut”,- tha Adam Mount, një anëtar në Federatën e Shkencëtarëve Amerikanë.
Megjithatë shumica e njerëzve janë skeptikë lidhur me sistemin e raketave të shfaqura nga Koreja e Veriut. Ata nuk mendojnë se hedhja e tyre, lidhet me demonstrimin e teknologjisë sesa me një demonstrim të forcës shkatërruese të Koresë së Veriut.
/Burimi: Daily Mail/Përshtati: Priza.al/
