Policia gjermane kreu bastisje kundër mafies italiane ‘Ndrangheta’ të mërkurën në koordinim me autoritetet në Itali, Belgjikë, Francë, Spanjë, Rumani, Brazil dhe Panama.
Sipas transmetuesit publik gjerman MDR dhe gazetës gjermane Frankfurter Allgemeine Zeitung (FAZ), policia e përfshirë në operacionin ndërkombëtar ekzekutoi mbi 100 urdhër-arreste kundër të dyshuarve që besohet të jenë të përfshirë në trafikun e kokainës, pastrim parash dhe evazion fiskal, ndër të tjera.
I koduar Operacioni “Eureka”, bastisjet erdhën pas pothuajse katër vjet hetimesh tepër sekrete ndaj organizatës mafioze kalabreze.
Sipas raportimeve të mediave, operacioni ndërkombëtar i së mërkurës ishte një nga më të mëdhenjtë që ishte kryer kundër Ndranghetas. Agjencitë e BE-së Europol dhe Eurojust u përfshinë gjithashtu në hetime.
Operacionet e policisë gjermane në shumë shtete
Organizata mafioze besohet se ka kontrabanduar sasi të mëdha kokaine nga Amerika e Jugut në Evropë në anije me kontejnerë që mbërrinin në Antwerp, Roterdam dhe portin kalabrez të Gioia Tauro. Një pjesë e dërgesës së kokainës u dërgua më pas në Australi.
Në Gjermani, bastisjet u përqendruan në objektiva në shtetet e Rhine-Westfalen, Bavaria, Turingia, Rhineland-Pfalz dhe Saarland. Mbi 1000 policë u vendosën në të gjithë Gjermaninë.
Hetuesit zbuluan një rrjet të gjerë restorantesh, piceri, kafenesh dhe akulloresh në shtetin perëndimor të Gjermanisë North Rhine-Westphalia, të dyshuara se ishin pjesë e operacioneve të pastrimit të parave të mafias.
MDR gjithashtu raportoi se anëtarët e dyshuar të Ndranghetas po hetoheshin në shtetin gjermano-lindor të Turingisë.
Në shtetin jugor të Bavarisë, autoritetet thanë se kishin hetuar një grua dhe shtatë burra, me kombësi italiane dhe midis moshës 25 dhe 48 vjeç, që nga korriku 2020. Grupi, me banim në Mynih, dyshohet se ishte i përfshirë në bashkë- financimin e kontrabandës së kokainës dhe pastrimit të parave.
Si e zbuluan autoritetet rrjetin ‘Ndrangheta?
Sipas raportimeve, hetimet filluan pjesërisht pasi autoritetet belge zbuluan një lidhje midis një picerie në qytetin e Genk dhe mafias ‘Ndrangheta në vitin 2019. Pronarët e restorantit dyshohet se ishin në kontakt me tregtarë të ndryshëm kokaine.
Policia më pas filloi të kontrollonte kushëririn e dy prej të dyshuarve që jetonte në Mynih.
Hetimet në telefonat kripto luajtën një rol të madh në drejtimin e operacioneve të së mërkurës. Policia ishte në gjendje të godiste shërbimet e kriptos EncroChat dhe SkyEcc, duke u dhënë atyre një paraqitje të shkurtër të punës së brendshme të organizatës mafioze.
Ndrangheta më parë kishte shmangur të fliste plotësisht në telefon, duke preferuar të udhëtonte qindra milje për një takim. Por pandemia e koronavirusit dhe kufizimi i lëvizjes i detyroi ata të ndryshonin taktika.
