Kandidati i LSI-së për deputet në qarkun e Korçës, Endrit Braimllari, ka bërë kallëzim penal për kundërshtarin e tij politik, Niko Peleshi me akuzën e ‘Shpërdorimit të detyrës’.
Lëvizja Socialiste për Integrim ka kallëzuar në SPAK Ministrin e Mbrojtjes, Niko Peleshin, i cili njëherësh është edhe shefi i shtabit politik të PS-së për qarkun e Korçës.
Akuzat e paraqitura ndaj ministrit janë për veprat penale “Shpërdorim të detyrës” dhe “Përdorimi i funksionit publik për veprimtari politike ose zgjedhore”.
Duke iu referuar dokumentit, përpos Peleshit, LSI ka bërë kallëzim edhe ndaj zyrtarëve lokalë si Petrika Tollkuçi, drejtori i Fondit Rajonal të Sigurimit të Detyrueshëm të Kujdesit Shëndetësor; Artur Qiramixhi, Drejtor i OSHEE Korçë dhe Ilir Bajlozi, drejtori i Drejtorisë Rajonale të Sigurimeve Shoqërore Korçë.
