Ballkani nuk është as i qetë dhe as i sigurt edhe pse pjesa më e madhe e shteteve të tij janë anëtare të NATO-s tashmë. Me Turqinë që del herë pas here nga “rreshti” dhe me Serbinë që po armatoset rëndë duke flirtuar sa me Rusinë dhe sa me Kinën, gjërat duket se nuk janë në normalitet.
Në plot 7 baza të ndryshme ushtarake në Shqipëri, po zhvillohet një stërvitje e madhe ushtarake këto ditë me emrin “Defender Europë 21”. Ajo është cilësuar si stërvitja më e madhe ushtarake në rajonin Ballkanit, që pas Luftës së Dytë Botërore dhe më e rëndësishmja në kuadër të NATO-s.
Por si për ta eklipsuar atë, ose për ta dubluar, Rusia dhe Serbia nisën sot dhe ato një stërvitje të përbashkët ushtarake pran Beogradit, si për të dëshmuar vendosmërinë e Moskës, për ruajtjen e influencës së vet në rajon.
Ministritë e mbrojtjes serbe dhe ruse thanë se, trajnimi i përbashkët i rreth 200 trupave speciale do të përfshijë “shkatërrimin e simuluar të një formacioni të paligjshëm ushtarak”, gjuajtjen me municione të vërteta dhe sulmet “anti-terroriste”.
Por sipas mediave kroate të cilat i referoheshin burimeve nga Beogradi, numri i vërtetë i trupave elitë të ardhura nga Rusia është të paktën 500.
“Janë rreth 500 forca elitë ruse në Serbi, mes të cilave forca speciale elitë të reparteve të GRU-së (Shërbimi i Inteligjiencës Ushtarake), FSB-së (Shërbimi Informativ) dhe Specnazve të ushtrisë, Një pjesë e madhe e tyre rreth 300 janë desantuar gjatë netëve në afërsi të bazës ruse të Nishit”,- citon mediat kroate “Globus”.
Por sipas tyre, ministria Serbe e Mbrojtjes e ka mbajtur sekret këtë numër, pasi një pjesë e tyre gjatë stërvitjes ushtarake mund të kryejnë edhe misione reale rikonjocioni dhe spiunazhi në vendet e rajonit.
Serbia, anëtare e partneritetit të NATO-s për Paqen dhe që kërkon zyrtarisht anëtarësimin në Bashkimin Europian, ka vazhduar të farkëtojë marrëdhënie të ngushta ushtarake, ekonomike dhe politike, si me Rusinë, ashtu edhe me Kinën. Me këtë të fundit Serbia ka nënshkruar disa kontrata tepër të rëndësishme për blerje armatimi dhe pajisjesh të teknologjisë së lartë ushtarake, me vlera në miliona euro.
Vetëm ditët e fundit Serbia plotësoi gjithë paketën e pajisjeve dhe armatimit për dronët e sjellë nga Kina, të cilët janë jo më dronë zbulimi, por edhe dronë sulmi për shkatërrimin e objektivave deri në 9 kilometra distancë me anë të raketave të interceptuara.
Ndërkohë, në stërvitjen, “Defender Europe 21”, sakaq marrin pjesë më shumë se 28 mijë trupa nga 26 shtete.
Shqipëria ka rol kryesor në këtë stërvitje, si vend mikpritës dhe stërvitor, duke vënë në dispozicion disa baza ushtarake ajrore, detare dhe tokësore.
/Priza.al/
