Presidenti rus Vladimir Putin paralajmëroi të dielën se Moska do të godiste objektiva të reja nëse SHBA-ja do të furnizonte Ukrainën me raketa me rreze të gjatë veprimi, sipas mediave shtetërore ruse.
Dorëzimi i armëve të reja në Kiev synon vetëm të “ndez edhe më shumë konfliktin e armatosur për aq kohë sa të jetë e mundur”, tha Putin në një intervistë për kanalin televiziv Rossiya-1, raportoi media shtetërore ruse TASS.
Në rastin e dërgesave të raketave me rreze të gjatë veprimi në Kiev, Rusia do të nxjerrë “konkluzionet e duhura” dhe do të godasë ato “objekte” që nuk i ka shënjestruar ende, tha ai.
“Nëse ato furnizohen, ne do të nxjerrim përfundimet e duhura nga kjo dhe do të përdorim armët tona, që I kemi të mjaftueshme, për të goditur ato objekte që deri tani nuk I kemi synuar ende,” tha Putin duke komentuar situatën në lidhje me furnizimin nga SHBA me sisteme të shumta raketore lëshimi (MLRS) në Ukrainë.
Furnizimi amerikan në Ukrainë në thelb nuk ndryshon asgjë, pasi Kievi kishte armë të ngjashme më parë, duke përfshirë raketa me rreze të ngjashme, kështu që ata thjesht po kompensojnë humbjet e tyre, tha Putin, sipas TASS.
Presidenti i SHBA Joe Biden tha të martën se SHBA-ja po i ofron Ukrainës “sisteme dhe municione më të avancuara raketash” ndërsa lufta e saj me Rusinë po vazhdon.
