Aleanca e Social Demokratëve të Pavarur (SNSD) fitoi në të gjitha nivelet dhe ne jemi fituesit e mëdhenj të zgjedhjeve, tha më 10 tetor lideri i asaj partie dhe anëtari i Kryesisë së Bosnjës dhe Hercegovinës, Milorad Dodik.
“Republika Srpska votoi për SNSD dhe koalicionin qeverisës,” shtoi Dodik në një konferencë shtypi në Beograd.
Zgjedhjet e përgjithshme u mbajtën në Bosnje dhe Hercegovinë më 2 tetor.
Kandidati i opozitës për president të Bosnjë-Hercegovinës entiteti Republika Srpska Jelena Triviq shpalli fitoren natën pas zgjedhjeve, por Dodik e bëri në të njëjtën kohë, si kandidat i koalicionit qeverisës.
Publikut iu prezantuan të dhëna të ndryshme për numrin e votave dhe nuk u shpallën rezultatet përfundimtare të zgjedhjeve të përgjithshme në Bosnje dhe Hercegovinë.
“Rezultatet paraprake tregojnë se kam 29 mijë vota më shumë në zgjedhjet për Presidentin e Republikës Srpska”, tha Dodik. Ai shtoi se 98 për qind e votave ishin numëruar dhe se avantazhi i tij ishte “i paarritshëm”.
Ndërkohë, opozita në Republika Srpska po proteston dhe kërkon një numërim të ri votash, me akuza kundër SNSD për vjedhje zgjedhore.
Më 5 tetor, partitë opozitare në RS i paraqitën një kërkesë Komisionit Qendror të Zgjedhjeve të BiH për një rinumërim të votave, duke përfshirë përsëritjen e zgjedhjeve. Ata pretendojnë se kanë konstatuar më shumë se njëqind parregullsi dhe se 65 mijë vota elektorale janë kontestuese.
Partia e Progresit Demokratik (PDP), Partia Demokratike Serbe (SDS) dhe Lista për Drejtësi dhe Rend besojnë se Jelena Triviq (PDP) mundi Dodikun në zgjedhjet për president të RS.
“Vetëm një kandidat ankohet (për rezultatet), të tjerët jo”, tha Dodik, duke shtuar se askund nuk është vërtetuar që kandidati i opozitës të jetë dëmtuar.
Dodik vlerësoi se opozita në zgjedhjet për presidentin e RS “deklaroi fitoren përpara se të fillonte numërimi i votave” dhe se koalicioni i tij “u soll me përgjegjësi dhe nuk dha të dhëna të përgjithshme”.
Ai tha gjithashtu se është “e papranueshme” që Komisioni Qendror i Zgjedhjeve të numërojë votat ngadalë, duke gjykuar se kjo është “dobësia e Bosnjë-Hercegovinës”.
Dodik akuzoi KQZ-në si “të uzurpuar nga të huajt”, se “nuk ishte zgjedhur ligjërisht” dhe se legjitimiteti i saj ishte “i dyshimtë”, si dhe se “ka shumë jologjikë në procesin e votimit”.
