Nga Avokat Arben Llangozi
Sipas listave të publikuara nga grupe hakerësh iranianë, emri i ish-Prokurores së Përgjithshme, Ina Rama, rezulton i përfshirë si bashkëpunëtore e shërbimit informativ shqiptar (SISH), një pretendim me peshë të rëndë publike dhe institucionale që ka ngritur reagime dhe shqetësim në opinionin publik.
Edhe pse bëhet fjalë për pretendime të dala nga burime jozyrtare, përmasat e akuzës dhe profili i lartë i personit të përmendur kërkojnë, sipas standardeve demokratike, sqarim të menjëhershëm dhe transparencë institucionale. Megjithatë, deri më tani, as znj. Rama nuk ka dhënë një qëndrim publik, dhe as institucionet e drejtësisë nuk kanë reaguar.
Heshtja e SPAK i cili nuk ka filluar asnjë hetim penal për këtë rast por edhe e KPA e cila nuk ka dalë me asnjë qëndrim, po shihet nga një pjesë e opinionit si problematike, pasi bëhet fjalë për pretendime që prekin integritetin e sistemit të drejtësisë, sigurinë kombëtare dhe besimin publik.
Mungesa e çdo reagimi zyrtar ka krijuar një vakuum informacioni, i cili po mbushet me spekulime dhe dyshime, duke dëmtuar më tej perceptimin publik mbi transparencën dhe llogaridhënien e institucioneve të reformës në drejtësi.
Në raste të ngjashme ndërkombëtare, figura publike të përmendura në dokumente të diskutueshme kanë dalë menjëherë me deklarata për të mbrojtur emrin dhe për të sqaruar opinionin. Në këtë rast, heshtja e ish-Prokurores së Përgjithshme dhe e institucioneve përgjegjëse po shihet si e pakuptueshme dhe e pajustifikuar.
Pyetja që mbetet pa përgjigje është e drejtpërdrejtë:Pse nuk ka asnjë sqarim publik për një pretendim kaq të rëndë dhe pse institucionet që kanë për detyrë garantimin e integritetit po zgjedhin heshtjen?
Derisa të ketë një reagim zyrtar, kjo çështje do të vazhdojë të rëndojë si një njollë dyshimi mbi transparencën e drejtësisë shqiptare.
