Burime konfidenciale nga BKH, bëjnë me dije se hetimet për aferën e “mikrokredive” janë në rrugë të “mbarë”. Ditët e fundit në SPAK kanë hyrë fshehurazi kokat e dyshuara të bandës së mikrolredive, ndërsa javën e kaluar, nga dyert e SPAK u pa të hynte dhe të dilte Dhori Kule, ish-rektor i Universitetit të Tiranës. Kule, deklaroi para kamerave se, “u pyet për një çështje të vogël për mikrokredi, pasi ka qenë anëtar i Këshillit Mbikëqyrës të Bankës së Shqipërisë”. Në të vërtetë, çështja për të cilën u pyet Dhori Kule nuk është e vogël, por më e madhja që po heton SPAK vitet e fundit. Është afera e “mikrokredive” ku mbetën viktima financiare rreth 100 mijë shqiptarë.

Hetimin për kupolën Bankën e Shqipërisë e ndjek prokurorja Dorina Bejko, bashkë me një grup hetuesish të BKH. Burime shumë të rezervuara tregojnë se hetimi i ‘peshqëve të mëdhenj’ nga SPAK pas një viti është në përfundim dhe pritet të dërgohet në GJKKO brenda muajit korrik. Kujtojmë që hetimi nisi në 2022 nga Prokuroria e Tiranës, pas një kallëzimi që bëri Dhoma e Përmbaruesve Privatë.

Prokurorja Ornela Rrumbullaku, e shkarkuar nga Vettingu, bashkë me hetuesen Erjona Daupaj, e cila është në arrati për çështjen “Toyota Yaris”, pas “hetimeve” e pushuan çështjen e Guvernatorit, por Gjykata e Tiranës, me gjyqtare Migena Laska e dërgoi çështjen për kompetencë në GJKKO. Kjo e fundit e rrëzoi vendimin e pushimit të dy grave të përjashtuara nga sistemi i drejtësisë dhe caktoi SPAK-un të fillojë të kryejë hetime, që me sa kuptohet pas një viti kanë gjetur “fajtorin”.

Përveç kësaj çështjeje, një tjetër hetim po zhvillon SPAK për aferën e “mikrokredive”. Altin Dumani caktoi për të ndjekur hetimet rivalin e tij për postin e drejtuesit, Edvin Kondili. Kallëzimi i Ministrit të Drejtësisë Ulsi Manja në maj 2024, kundër “MCA” të Olsi Ibros dhe “Final” të Arben Meskutit, u shoqërua me denoncimin e një duzine përmbaruesish, avokatësh, ekspertësh e noterësh, që ishin kallëzuar edhe më parë nga paraardhësja e tij, në vitin 2020.

Prokuroria e Tiranës nxitoi pas katër vjetësh të bëjë disa arrestime dhe ta përcjellë çështjen në SPAK në kuadër të një Grupi të Strukturuar Kriminal që kishte mashtruar mijëra qytetarë. Banka e Shqipërisë, sapo prokuroria veproi, nxitoi të heqë licencat e dy kompanive kryesore në aferën gjigante, MCA dhe Final. Më 20 korrik 2024, pronari i MCA, Olsi Ibro u deklarua nga policia se u hodh nga një pallat në ndërtim duke kryer vetëvrasje.

Ngjarja u mbulua me mister për muajt më pas, ndërsa MCA dhe Final u sekuestruan duke iu lënë për menaxhim Agjencisë Shtetërore të Administrimit të Pasurive të Sekuestruara. Prokurorët e Tiranës në nëntor 2024 e dërguan për kompetencë “pataten” e nxehtë të mikrokredive në SPAK, pas katër vjet hetimesh pa një rezultat final.

Prokuroria e Tiranës transferoi për në SPAK edhe një çështje të tretë në vitin 2024. Hetimi i nisur për një rast mashtrimi me kredi, e çoi prokurorin Leonard Filopati drejt kupolës së Bankës së Shqipërisë. Filopati thuhet se zbuloi lidhje të drejtorëve kryesorë të BSH-së, përfshirë edhe Deniz Derallën me skemën e shitje-blerjes së mikrokredive. Të gjithë bashkë ai i përcolli në zyrën e Altin Dumanit. Nuk është e qartë nëse hetimet për këtë çështje të tretë rreth aferës së mikrokredive po i zhvillon vetë kreu i SPAK, apo është bashkuar me çështjet e tjera.

Afera e mikrokredive ka shkaktuar disa të vdekur dhe mijëra viktima financiare. Me sa duket hetimet kanë gjetur fundin dhe autorët e gjallë, për t’i shenjuar me vulën “fajtor”. SPAK është një makineri që lëviz shumë ngadalë, por ka treguar se kur shkel, shkel shumë rëndë.